Олимпиадалық резервтің оқу-жаттығу жиындары

«Дарын» республикалық ғылыми-практикалық орталығы қараша-желтоқсан айларында республиканың олимпиадалық резервіне қатысушылар үшін жаратылыстану-математикалық бағыттағы пәндер бойынша оқу-жаттығу жиындарын өткізуде.

Жиындардың мақсаты – республикалық және халықаралық деңгейдегі олимпиадаларға дайындық.

24 қараша мен 5 желтоқсан аралығында Алматы қаласында экономика бойынша олимпиадалық құрама үшін оқу-жаттығу жиындары өтті. Жиынға қатысуға облыстық кезеңнің жеңімпазы және Экономика бойынша республикалық олимпиаданың қорытынды кезеңінің қатысушысы, Рудный қаласының № 1 жалпы білім беретін мектебінің оқушысы Карев Егор шақырылды.

Жиындар бағдарламасында жобаларды дайындау, кейс-жобалармен жұмыс істеу және тағы басқалар қаралған. Дайындық ағылшын тілінде жүргізіледі, өйткені оқушылар олимпиада тапсырмаларын ағылшын тілінде орындайды.

 17 желтоқсаннан бастап Алматы қаласында физика бойынша олимпиадалық резервке қатысушылар үшін жиындар басталды. Жиынға Дарынды балаларға арналған «Білім-Инновация» лицей-интернатының оқушысы, Физика пәнінен республикалық олимпиаданың жеңімпазы Әбдіқадір Таир қатысады.

10 күн ішінде қатысушылар теориялық және практикалық сипаттағы тапсырмаларды шешеді. Жиындар а.ж. 28 желтоқсанда аяқталады.