2025 жылдың 27 тамызында «Қостанай дарыны» өңірлік оқу-әдістемелік орталығы Қостанай облысының мамандандырылған және инновациялық мектептерінің педагогтері үшін секциялық алаң өткізді. Талқылау тақырыбы қазіргі мектептің өзекті міндеттерінің бірі – жаратылыстану-ғылыми және физика-математикалық бағыттағы сабақтарда дарынды оқушылардың метапәндік құзыреттіліктерін дамыту болды.
Секцияда дарынды балалармен жұмыс істейтін педагогтер бас қосты. Іс-шараға қатысушылар өздерінің табысты тәжірибелерін ұсынды, оқушылардың әлеуетін ашуға бағытталған жаңа тәсілдермен, әдістемелер және технологиялармен бөлісті.
«Қостанай дарыны» ӨОӘО директорының орынбасары Л.Байтенова өзінің баяндамасында оқушылардың Республикалық олимпиадасы мен ғылыми жобалар конкурстарының нәтижелерімен таныстырды.
«Қостанай қаласы білім бөлімінің №18 мектеп-гимназиясы» КММ мұғалімдері А.Шарипов пен З.Серғазинаның баяндамасы мазмұнды және тәжірибеге толы болды, онда олар SAMR моделін пайдаланудың тиімді тәсілдерін көрсетті.
Қостанай қаласындағы А.М. Горький атындағы гимназиясының математика пәні мұғалімі Д.Клышева математиканы оқытудың инновациялық әдістері мен тәсілдерін ұсынды, ал оның әріптесі – Қарасу ауданы Октябрь жалпы білім беретін мектебінің мұғалімі А.Пылыпива оқытудағы креативті тәсілдер арқылы метапәндік құзыреттілікті дамыту туралы баяндама жасады.
Дарынды оқушылармен жұмыста кіріктірілген білім беру технологияларын пайдалану бойынша жұмыс тәжірибесімен «Озат» мамандандырылған ақпараттық технологиялар мектеп-лицей-интернатының физика пәнінің мұғалімі Ж.Гаппаров бөлісті. Қостанай қаласындағы №7 жалпы білім беретін мектебінің физика пәні мұғалімі К.Шиукашвилидің метапәндік құзыреттілікті дамыту құралы ретінде білім беру квиздерін қолдану тәжірибесі үлкен қызығушылық тудырды.
«Olzha High School» жеке мектебінің химия пәнінің мұғалімі О. Джангабулов химия пәнін оқытудағы инновациялық әдістер мен тәсілдерге баса назар аударды. Секция соңында Тобыл қаласының №2 мектебінің география пәнінің мұғалімі М.Травкина сабақты метапәндік дамыту зертханасына айналдыруға болатын шабыттандыратын кейс көрсетті.
Секциялық алаңның жұмысына Қостанай облысының мамандандырылған және инновациялық мектептерінен 29 мұғалім қатысты. Алаң идеялармен алмасу, кәсіби байланыстарды нығайту және Қостанай облысында дарынды балаларды қолдау жүйесін одан әрі дамыту үшін тиімді платформаға айналды.
